（108）“尿布先行”/梧桐树下
“门外头好像有人，我去看看。”仁仁姆妈盳了一眼窗外，跟坐在枱子边吃茶的晶晶阿娘林奶奶两介头讲，随即起身去开门。
“啊，是侬啊！我眼梢里看到有个人影门口一晃，原来是侬，侬哪恁有空来啊？”
仁仁姆妈再一看“酒甏”背了三竹篓无锡油面筋，还呒么等仁仁姆妈开口，“酒甏”讲了：
“我晓得迭个辰光，倷三介头肯定老规矩在侬厨房间吃茶讲山海经，我拿点无锡油面筋来给倷，老太婆去无锡乡下，带回来不少，阿拉大家吃点。”
“酒甏”拿三竹篓油面筋放枱子上，再从布包里拿出三盒无锡肉骨头三包太湖百合干。
“哦唷！嘎许多物事啊！迭个哪恁好意思，侬留了，自家屋里慢慢吃，亲家母屋里送点，侬覅一有好物事就来给阿拉。”晶晶阿娘觉到不好意思。
“亲家母屋里，昨日兒子就拿过去了，亲家母哪恁好怠慢，对伐？”
“迭点太湖百合雪雪白，真好，侬覅给阿拉了，熬点白米粥，放点红枣，给倷新嫂嫂吃。”仁仁姆妈客气，称“酒甏”家新进门的儿媳妇“新嫂嫂”。
“阿拉有，阿拉有！老太婆迭趟像跑单帮从乡下拿来交关，倷尽管收下来，又不是啥好物事，倷覅客气。不是讲啥，伊拉无锡乡下呒啥好送人咯物事，无锡人侪是老刮子勒娘舅，门槛精来兮，噱头好唻兮，倷看，无锡人送人的物事，不是呒么多少肉的无锡肉骨头，就是空心汤团一样的油面筋，要么就是烂糊泥捏捏的无锡大阿福。侪讲潮州人潮州门槛精，其实无锡人门槛最精！哎，哎，迭些言话阿拉老太婆面前不好讲咯，讲了呒么太平日脚了，老酒小菜呒么了，还要被伊椠头皮。”“酒甏”讲好朝大家笑笑。
“侬啊，讲到底还是怕老婆！”晶晶阿娘看着“酒甏”摇摇头。
“嘿，嘿，”“酒甏不好意思了，不过，嘴巴还硬，“阿拉男子汉大丈夫不跟伊计较，伊一直讲阿拉绍兴人只有咸齑霉干菜臭豆腐，不是咸的，就是臭的霉的，讲阿拉绍兴人是盐钵斗。伊拉无锡人样样物事要放糖，就差泡饭用糖拌了，真的，老太婆烧菜放起白砂糖来，像糖覅钞票糖票，伊烧酱小排，倷晓得哪恁，筷子搛起一块小排后面拖好几根长长糖丝，像拔丝苹果一样，倷吃得消伐？侬不好提意见咯，一提意见，伊马上掼纱帽！马上呒么吃老酒小菜了，乃么，我死蟹一只！”
仁仁姆妈晶晶阿娘林奶奶差不多眼泪水也要笑出来了。
“倷老夫老妻快要抱孙子了，还像小人一样！哪恁嘎有劲！”仁仁姆妈笑着讲，“不过，言话讲回来，侬覅讲无锡不好，无锡好地方，无锡油面筋蛮好吃的，油面筋炒炒青菜，简简单单，就是一道老好的小菜，油面筋香菇毛豆子炒素老有味道，夏天烧只油面筋丝瓜毛豆，清清爽爽，老开胃，油面筋还可以烧油面筋塞肉，老老少少侪欢喜。太湖百合也是好物事……。”
“酒甏”看到大家开心，言话更加多了。
“阿拉老太婆就是死脑筋，伊心中无锡最好，全国第一。呒么别个地方比得上无锡了。有一趟，阿拉兒子跟伊讲白相，兒子讲，‘姆妈，侬一直讲无锡好，无锡好，侬看，金银铜铁锡，无锡连锡也呒么，好了啥地方？’老太婆气得骂兒子，我在一旁听了哈哈笑，伊一记头火气统统泼到我身上，结果，我一个礼拜差点点呒么吃老酒小菜。为啥讲‘差点点’呢？阿拉亲家母救了我。亲家母对阿拉兒子老好，看见阿拉兒子欢喜吃伊拉湖州人氽的‘‘弯转饼’，就是面拖河虾，淡水河虾（青虾）一下油锅就弯起来了，湖州人就叫河虾‘弯转’，面拖淡水河虾，湖州人叫‘弯转饼’，丈母娘盛了一小碗给阿拉兒子带回来吃。兒子同情我，拿一碗‘弯转饼’统统给我过老酒。……阿拉亲家母烧菜一只鼎，老赞！噢，迭句言话，阿拉老太婆也覅听咯，兒子每趟讲丈母娘能干，老太婆就酸溜溜不开心了，讲：
“‘哎哟哟，有了丈母娘，嫌鄙娘亲了’”，还隔手拿我当出气筒。……啊呀，讲言话讲得忘记辰光唻！我该回去了。 ”
“酒甏”看天色暗下来了，跟大家打招呼讲了“再会”，转身出门。
“酒甏”走后，晶晶阿娘林奶奶也起身准备回家，突然听到几记敲门声，接着门推开了，一看“酒甏”立勒门外，
“对勿住，对勿住，我又来了，最，最，最重要咯事体忘记了 。今朝，老太婆关照我，要我顺带便问问倷几家有老老老旧的，不能再铺床做床单，或者做被里子的旧床单旧被里伐，假使有么，给阿拉几条，阿拉拿布票钞票跟倷调，老太婆要做尿布。”
“倷新嫂嫂有了？”仁仁姆妈惊喜地问。
“哟，迭是大事体，大喜事啊！恭喜侬啊！”林奶奶马上祝贺。
“‘坐床喜’啊？大喜啊！恭喜侬啊！”晶晶阿娘总归有老套贺喜言话。
仁仁姆妈晶晶阿娘林奶奶的贺喜话讲得“酒甏”满心欢喜。
“借倷吉言，借倷吉言！不过，好像还呒么，我跟阿拉老太婆天天偷偷看伊啊有恶心，啊有呕吐，到现在一点动静呒么。……现在年轻人想法不一样，阿拉兒子跟媳妇不想婚后马上有小人，伊拉要享受享受小夫妻生活，是老太婆叫我先来跟倷商量咯。”
“倷媳妇还呒么，侬急啥啦？等有喜再准备尿布也来得及啊！”晶晶阿娘讲。
“不是讲‘兵马未动粮草先行’，阿拉媳妇还呒么，尿布还是要先准备起来咯，迭个叫‘孙子未有尿布’先备’，先准备起来总归不错，对伐？讲给倷听，阿拉老太婆听人家讲，有的人家尿布备的不多，碰到上海黄梅天，尿布晒不干，潮叽叽的尿布给小人用，结果小毛头屁股长红斑，小人痒得又哭又闹，睏不安稳，所以要多准备一些尿布，还要多准备几块棉尿布，还要做小囝穿开裆裤后面挡风的棉帘子，交关物事要做了，阿拉屋里旧床单旧被里不够啊！小人皮肤嫩不能用新床单新被里啊！阿拉还要问倷要肥皂票，听人家讲，尿布不能用肥皂粉汏，肥皂粉汏不清爽，小人皮肤嫩受勿了肥皂粉刺激……。”
“侬真是好阿爷，孙子还呒么生出来就开始准备了，真正难得。”仁仁姆妈称赞道。
“侬嘎卖力，个么，阿拉也卖力帮侬个忙，侬媳妇要是现在有了么，小毛头生出来可能是大热天，阿拉屋里有两只藤摇篮，双胞胎小辰光睏的，阿拉给侬一个，侬要伐？要么，现在跟我去看看，中意的言话，我帮侬留勒嗨，不送给人家了。”
“好！好！好！要！要！要！”“酒甏”一听是藤摇篮，又是双胞胎男小顽睏过的，老老吉利，满口答应下来，“我现在就跟侬去看，假使屋里放得落，就叫阿里兒子来搬，哪恁？”
“好呀，好呀，现在就去。”
众人告辞仁仁姆妈，“酒甏”跟在晶晶阿娘后面屁颠屁颠去看藤摇篮。
今朝收获太大了，“酒甏”心里高兴，暗忖，今朝超额完成任务，功劳嘎大，可以照牌头叫老太婆弄几只吃老酒小菜了，想到此，脚步欢快起来。
