（106）“下管阴沟洞上管大总统”/梧桐树下
“马兰花，马兰花，风吹雨打都不怕，勤劳的人们在说话，请你马上就开花。”
仁仁、晶晶、文颖、囡囡四个小丫头轻声唱着《马兰花》主题歌，高高兴兴走出儿童艺术剧场。
延安中路555号儿童艺术剧场是仁仁、晶晶、文颖、囡囡，还有阿庚阿康，还有伊拉学堂所有同学最最最欢喜来的地方，伊拉从小在此地看电影，看话剧，当剧场酒红色丝绒幕帘缓缓拉开，奇妙的世界在伊拉眼前展开，伊拉眼睛发光，伊拉心情激动，伊拉飞进了舞台上的世界。
伊拉在这里观看了《马兰花》《灰姑娘》《雪女王》《小蝌蚪找妈妈》《大闹天宫》《哪吒》《没头脑和不高兴》》《花儿朵朵》《宝莲灯》《海螺姑娘》《神笔马良》《红孩子》《小梅的梦》《小铃铛》《大闹天宫》《小兵张嘎》……。
今朝，仁仁、晶晶、文颖、囡囡用平常积起来的零用钿买了票又来看戏。
“《马兰花》太好看了！真的老老好看！老老好看！我还想再来看！”仁仁赞不绝口。
“真的，老赞咯！下趟再来看！”平常不太讲言话的囡囡轻轻应和。
“倷还要看啊！” 晶晶瞪大眼睛看着仁仁囡囡。
“我也想再看一遍，两遍。侬大惊小怪做啥？”文颖咯咯咯笑着讲。
“哎，哎，倷还记得伐？阿拉小学三年级辰光，学堂组织阿拉看《马兰花》，阿拉班里的‘小耳朵’‘汤司领’‘二师兄，还有范国良侪从座位上跳出来，冲到过道上去打‘老猫’，伊拉呒轻呒重乱打，老师上去拿伊拉拉开，别个，‘老猫’肯定要被伊拉打伤了！”
“伊趟，‘小耳朵’从座位上跳起来，跨过阿拉几个女生的头，冲到过道上去打‘老猫’。伊一只脚踢到我耳朵，老老痛！”囡囡摸摸耳朵讲，好像伊的耳朵现在还老痛。
“伊拉乱来咯，倷听说伐？音乐老师去帮忙维持秩序，拾外快吃到一拳。”
“真蛮好笑，就是演‘老猫’的演员太倒霉了，呒么办法，‘老猫’太坏了，大家侪恨‘老猫’。”
“哎，阿庚阿康去打‘老猫’了伐？”文颖好奇地问。
“阿庚呒么去，伊就坐勒我后面一排。阿康去了，伊迭种事体最起劲了，不过伊呒么打到‘老猫’，伊讲过道太窄了，追打‘老猫’的人老多，伊轧不上去，连‘老猫’的衣裳也呒么摸到。”
“今朝，阿拉还好呒么约伊拉一道来看戏，伊拉要是去打‘老猫’，覅太尴尬哦！”
“现在，伊拉又不是小学三年级的男小顽了，不会去打‘老猫’了。再讲，现在伊拉欢喜看大人电影了，听阿庚讲，伊拉两介头准备去西海电影院看《夜半歌声》。” 晶晶最了解阿庚阿康了。
“哦哟哟，伊拉去看啊？迭部电影老老嚇人咯？我呒么胆子去看。我阿哥文硕看过了，伊讲，电影里的男主角毁容后的样子老吓人，交关人吓得乱叫。”
“哎，哎，覅讲了，看看前面啥人走过来了。” 囡囡轻轻提醒。
仁仁几个一看，阿庚阿康两个风风火火走过来，老开心的样子。
“咦，伊拉哪恁从伊面过来？倷看伊拉走路的样子，两介头又不晓得搞了啥名堂，嘎开心！”晶晶斜眼看着阿庚阿康讲。
阿庚阿康刚走近，晶晶就问：
“喂，倷到啥地方去了？又去闯祸了？”
“覅瞎讲！侬讲阿拉闯祸，阿拉就不讲给侬听阿拉吃到啥个好物事了。”
“哦？倷吃到啥好物事了？”
“西海电影院旁边的生煎馒头！好吃的不得了！”阿康竖着大拇指讲，“上海滩第一名！”
“真的？”晶晶问，仁仁文颖囡囡侪过来听。
“真咯！”阿庚帮阿康讲，“真正老老好吃，皮又薄又有韧性，老有嚼头，馅芯又鲜汤汁又多，倷看，阿康迭个家伙吃相急吼吼，上来一大口，汤汁侪溅到我衣裳上，倷看！”阿庚指指衣裳的油渍，“还有，伊拉的生煎馒头的‘底板’，啊是叫‘底板’啊？就是生煎馒头的底，老薄，只有铜板迭点厚，煎得脆脆的，咬一口刮啦松脆，焦香扑鼻，真正好吃！回味无穷！”
晶晶仁仁文颖囡囡听得馋吐水哒哒滴！
“倷想吃伐？……还有阿庚育才中学对面炒面大王的两面黄炒面也老老好吃咯。”
“覅讲啦！阿拉馋煞啦！”
“阿拉带倷去！带倷去吃！”阿庚老诚恳。
“阿拉呒么钞票。倷两介头暑假里捉皮虫，赚了交关钞票。阿娘不让我跟倷去，在屋里帮伊做家务，拣菜剥豆倒垃圾，一分铜钿也呒么咯。” 晶晶老委屈。
“覅紧，覅紧，我请客。”阿庚大方地讲。
“哎，哎，我讲，侬也可以赚钞票咯，侬帮我汏袜子，汏一双两分洋钿，哪恁？”阿康老鬼，立刻有了主意。
前两天，顾妈在汏阿庚阿康的袜子，阿娘走过闻到一股冲鼻头的恶臭。
“啥物事嘎臭？”阿娘四下张望。
“用不着寻！脚盆里，双胞胎的臭袜子，贼臭贼臭！嘎臭的袜子要单独汏，跟衣裳放一道，衣裳侪要臭脱！”顾妈指着脚盆里的几双袜子讲。
“明朝叫伊拉自家汏！啥人叫伊拉穿得嘎臭咯！”
刚刚阿康听晶晶想赚铜钿，个么，正好，让伊帮忙汏臭袜子赚钞票！
“晶晶，侬帮我跟阿庚汏袜子，每双两分洋钿，哪恁？侬赚了钞票。阿拉带侬去吃生煎，吃两面黄炒面，哪恁？”
“两分洋钿一双，太少了！”
“个么，五分洋钿一双？”
“倷袜子老臭咯，倷必须明天换。” 晶晶不笨，脑子转得飞快，伊心里盘算，一个礼拜汏两双袜子，一个礼拜只赚一角洋钿，太少了，叫双胞胎每天换袜子，袜子不会太臭，还加，迭恁，一个礼拜可以赚七角，一个号头可以赚两到三块洋钿，迭个还差不多。
“好，好，就迭恁。”阿康老爽气。
“拉勾！覅我帮侬臭袜子汏好，侬脚上穿好，赖账了！“
“好，好！拉勾。”阿庚先拉了勾。
“大丈夫讲言话，一句是一句，侬还怕阿拉赖啊！” 阿康一边讲一边上来拉了勾。
“哎，倷看，前面，南京西路铜仁路口哪恁有嘎许多人啊？”文颖指着前面铜仁路口叫大家看。
“啊？倷看，此地交通管制了。”
“咦，现在又不是开庙会的辰光？”
几介头叽叽喳喳议论着，加快步伐朝铜仁路走。
走近一看一打听，原来电影厂借南京西路铜仁路口的上海咖啡馆拍摄电影《霓虹灯下的哨兵》中一个镜头。
上海咖啡馆四周已经拉起来几条绳子作为禁止通行的“警戒线”，四周马路交通封锁，路过的行人，附近的居民拿铜仁路口围个水泄不漏，个个踮起脚尖伸长头颈朝上海咖啡馆张望，希望能一睹演员风采。
伊拉等啊等，只看到摄影组的工作人员跑来跑去，电线拉来拉去，聚光灯搬来搬去，警察叔叔踱来踱去，一位里弄干部拿着喇叭哇啦哇啦喊话：“不要轧（挤），皮夹子（钱包）看看牢，小心‘三只手’（小偷）。” “钞票，肉票，豆制品票放放好，呒么了，一个号头日脚（日子）呒么办法过了。”
“哎，看见伐？” 仁仁看了一眼在哇啦哇啦喊话的五六十岁阿婆跟晶晶讲，“对过弄堂的李家姆妈卖力伐？”
“伊是阿拉此地的治保主任，伊一向老老卖力。噢哟，伊旁边是阿拉居委会主任张阿姨，看来今朝里弄干部全部出动来维持秩序了。”晶晶低声讲。
“哎，文颖，侬奶奶也在维持秩序，侬看到了伐？”
“看到了，老早看到了，我晓得伊一定会来帮忙维持秩序，里弄里有啥事体，伊总归跑了前头，老积极咯。”
迭个辰光，里弄里负责礼拜四搞爱国卫生大扫除的蔡家姆妈朝仁仁晶晶文颖囡囡走过来：
“哎，仁仁晶晶文颖囡囡，倷几位妹妹，听我讲，倷一步步朝前走，越来越朝前靠了，倷看，倷已经超出警戒线了，来，听蔡家姆妈言话，快朝后退退，朝后退退。”
仁仁晶晶几个赶紧朝后退，慌忙中仁仁踩到了后面人的脚。
“啊！啊！对不起，对不起！”仁仁赶紧道歉，一看踩痛了“跷跷板”爷叔。
“不碍，不碍，大家靠得太近了。”“跷跷板”爷叔向来和气。
蔡家姆妈也连连道歉，“啊呀呀，啊呀呀，是我太心急，催得太急，啊有踏痛啊，不好意思啊，不好意思啊！”
“不碍，不碍！脚脚头呒么踏脱。”“跷跷板”爷叔蛮客气，“蔡家姆妈，今朝，此地到底做啥啦？”
“拍电影，拍电影里一个镜头，好像是拍一个女特务跟一个坏人接头……。要到天黑了再开始拍，早了。我已经关照屋里两个小人自家烧饭，自己先吃起来，覅等我。”
“蔡家姆妈，倷的工作老辛苦的，一天做到夜，一年做到头，几乎呒么休息天哦。”
“是呀，是呀，早上，尤其的礼拜四早上要负责大扫除、夜里要摇铃关照大家小心火烛、逢年过节要负责发票证、油票糖票肉票鱼票香烟票、过年要按大户小户发年货，还要慰问光荣人家，平常要调解邻里关系婆媳关系，若有外宾来，要负责外宾的安全，外国领导人的安全，今朝又要管拍电影了，真正样样色色要管，天天忙得头五头六，侬呒么听人家讲啊？伊拉讲，阿拉迭帮子里弄干部婆婆妈妈管的事体最多，手中权力最大，下管阴沟洞上管大总统！”
大家侪笑了。
