（106）护花使者/梧桐树下
“阿爸，侬来啦。”慧娟下班，刚走出富丽店门，一眼看到“酒甏”，开心地过来拉住“酒甏”的手
“酒甏”咪咪笑着问：
“阿爸来跟侬一道回去，侬开心伐？”
“开心，当然开心！阿爸最欢喜我唻！”慧娟言话甜甜咯，声音糯糯咯，听得“酒甏”迷花眼笑。
“走，去凯歌，阿爸今朝要给侬买生日蛋糕，姆妈在屋里帮侬下长寿面！”
“嘎隆重啊，小生日呀，一碗阳春面一只荷包蛋可以了！”
“覅瞎讲！老早条件差，现在条件好了，侬阿爸袋袋里有两钿了！”
“谢谢阿爸！”慧娟亲亲热热地双手抱住“酒甏”的胳膊，半拉半拖着“酒甏”朝前走。
“小丫头，嘴巴甜唻！”“酒甏”被囡娪花得浑身骨头像笃了五个钟头的老胖肉塌塌酥。
“酒甏”其实老早就来了，伊不敢进富丽，怕影响囡娪工作，立勒富丽店外头等囡娪下班。
“阿爸，侬现在哪恁常朝来跟我一道回去啊？”慧娟觉到有点奇怪。
“阿爸报名参加了业余工人写作班，领导同意我改上常早班了。不上课的辰光，我就来此地江宁路口的上海旧书店逛逛看看，里面有交关好看的旧书。逛好旧书店就过来跟侬一道回去。”
“真咯？是迭恁啊！”慧娟听了先是一惊，伊晓得伊阿爸不欢喜看书，最多翻翻武侠小说连环画，现在要搞写作了！报名参加工人业余写作班了！慧娟盳盳天，太阳还是从西边落下去呀！哪恁桩事体啊？！阿爸的变化也太大了！不管哪恁，阿爸有迭恁大的转变，还是老老开心的事体，慧娟熬不牢要跟伊阿爸开玩笑。
“哦哟！阿拉阿爸现在老要求上进咯么！活到老学到老，阿拉向侬学习！”慧娟边讲边朝“酒甏”眨眼睛。“酒甏”晓得自家囡娪小姐在“刺激”伊，老焐心。要是屋里的老太婆刺激伊，“酒甏”覅听，有辰光还要光火，有辰光还要顶撞两句，真正奇怪哦，同样屋里自家人，同样是女人，囡娪跟老太婆就是不一样！
“小丫头，今朝吃过蜜糖啦！”“酒甏”习惯性地去拉囡娪小辫子，拉了个空，囡娪工作后就拿辫子剪脱了，囡娪真的是大人了。
“阿爸，阿爸，侬写的书要是出版了，侬第一本签名的书给我噢！”囡娪又甜甜地来一句。
“酒甏”一听，心里咯噔一记，啊，啊，乃么得僵，我讲讲去工人业余写作班，实际是为了可以上常早班，可以来陪囡娪一道回去啊！写作班只去过三，四次就逃课了，老师布置要看的书，一本呒么看过，老师布置要写的短文，一个字也呒么写过！咳，咳，咳，小丫头不懂，“酒甏”看了一眼身旁的囡娪，在心里对自家讲，小丫头，侬晓得伐，阿爸争取上常早班是为了跟侬一道回去，一路保护侬啊！
陪囡娪一道回家对“酒甏”来讲相当重要，迭个侪因为裁缝阿祥的一句言话。
那天，裁缝阿祥端着饭碗又来陪“酒甏”吃老酒，正好碰到“酒甏”囡娪慧娟下班回来。
“阿祥伯伯，侬好！”慧娟有礼貌地招呼。
裁缝阿祥看着打好招呼回屋里去的慧娟对“酒甏”讲：
“真正黄毛姑娘十八变，倷慧娟不谈了，越来越出挑了。”
“真的，我也觉到阿拉囡娪越来越好看了。”“酒甏”咪口老酒讲，心里覅太得意噢。
“讲给侬听，” 阿祥朝“酒甏”跟前凑凑，“侬囡娪现在老出名咯！到我裁缝摊来做衣裳的婆婆妈妈侪晓得侬囡娪，侪讲伊服务态度好，量布裁布手脚快，算盘打得好，还蛮为顾客着想，帮顾客精打细算，节约布料，大家侪到富丽去，侪到伊柜台去买布。一次，一个阿姨来，讲到侬囡娪，伊讲倷囡娪是南京西路一支花，不光光买布的婆婆妈妈欢喜伊，交关小青年覅太欢喜伊，伊拉有事无事到富丽去，东门兜进去，西门逛出来，就是为了绕侬囡娪柜台兜一圈，眇一眼侬囡娪，有搭呒搭跟侬囡娪讲两句，恐怕伊拉侪对侬囡娪蛮有意思，侪想跟侬囡娪搿朋友。”
“啊？”“酒甏”搛菜的手停在半空中，张大眼睛看牢裁缝阿祥。
“侬做啥不早点讲给我听啊？”
“咦，侬迭个人滑稽伐？我哪恁晓得侬想听迭种事体？”
“迭个我当然要晓得，会不会有坏人来骗我囡娪，迭个大事体啊！”
“侬真异样怪徳，侬囡娪几岁啦？还怕被人家拐了跑啊？！小青年欢喜看伊又哪恁？不给人家看，个么，侬拿侬宝贝囡娪锁勒屋里厢，囥勒樟木箱里头，塞了眠床下头！碰得到侬迭种人咯！”
“不是，我担心有坏人……。”
“覅瞎想八想，坏人呒么嘎多，……当然也不是呒么，但是，此地是上海市中心的中心啊！啥地方来坏人！再讲，啥人不欢喜看好看的物事好看的人！侬看弄堂口马路边总归有三，五个小青年插蜡烛，伊拉看到长得好看的女青年走过，侪眼睛齐刷刷行注目礼，迭个又不奇怪咯，爱美之心人人侪有。侬年纪轻辰光不是迭恁啊？！侬到现在一把年纪了还不是迭恁啊？！我看到侬好几趟吃老酒辰光看到好看的人走过，酒杯捏在手里，老酒不吃了，等好看的女人走到看不到的打弯角子，再举起酒杯吃酒，是伐？”
“哎，哎，轻点，轻点，覅哇啦哇啦，好伐？给阿拉屋里的听到，以为我真的在外头花痴嗒嗒，又要烦不清了，侬弗不记得啦？上趟，我帮菜场轧姘头的乌贼鱼写检讨书，老太婆以为我轧姘头，拉牢我耳朵，拖我去派出所，痛哦！我耳朵快给伊拉下来了。我不是怕老婆，我是吃不消伊！”“酒甏”讲到此，情不自禁地回头看看伊屋里灶披间的窗。
阿祥师傅看着“酒甏”意味深长地笑笑：“讲讲不怕老婆，看灶披间窗做啥，做贼心虚！阿拉就承认自家怕老婆，怕老婆又不坍台咯！侬脑子坏脱了！上次听人家讲，现在的讲法是‘爱就会怕，怕就是爱， 爱得越深，怕得越结棍’。”
“酒甏”不响，伊心里有点烦，囡娪长大了，又长得漂亮，要自家多多关心了。
阿祥看“酒甏”不响，晓得伊有心思，便讲：
“讲给侬听，坏人不是呒么，不过，阿拉上海滩治安还是蛮好咯，蛮太平咯。上个月，江宁路口的新成溜冰场就捉了两个流氓小阿飞，伊拉在溜冰场里横冲直撞，故意撞溜冰的女青年，吃豆腐，侬晓得伐，结果捉进去了。迭些小阿飞真正叫人看了恶心，一只飞机头，一件花衬衫，一条小包裤，一双尖头鞋，嘴上叼根香烟，一副坏人样子！迭些人是该捉，捉去劳改！”阿祥看了看“酒甏”讲，“所以，我讲，侬兒子结好婚了，用不着侬操心了，现在应该关心关心侬囡娪了，伊应该有男朋友了，有个男朋友陪伊走，小阿飞就不敢碰侬囡娪了，迭个男朋友叫啥，叫‘护花使者’，我也是听来做衣裳的婆婆妈妈讲的。”
迭句言话“酒甏”听进去了，嗯，“护花使者”，我爷老头子自家当“护花使者”，最保险。
自此，南京西路富丽绸布店附近，人们常常可以看到“酒甏”的身影，到今朝，“酒甏”接慧娟下班回家已经快三个月了。
三个月来，每天夜快头，“酒甏”慧娟一道走在南京西路上，“酒甏”亲眼目睹迎面过来的行人统统两眼看着慧娟，竟然呒么一个人朝“酒甏”扫一眼，路人对父女两个人的“待遇”真正大推大板，“酒甏”不生气，伊更加觉到当“护花使者”的重要。
走在囡娪身旁，“酒甏”老得意哦：看，侪欢喜看我囡娪，我囡娪真的老漂亮，看，伊拉侪眼热煞我了，呵，呵，伊拉啥人赅得起嘎好的囡娪啊！
“酒甏”跟慧娟两个介头手挽手并肩朝凯歌走，到了南京西路江宁路口，慧娟讲：
“阿爸，对面就是上海旧书店，侬要进去看看伐？”
“进去做啥？”
“咦，侬不想买点书看看啊？倷写作班，老师不叫倷看点啥个书？”
“老师，老师，当然叫阿拉看书……，”“酒甏”不晓得讲啥好，突然，看到对马路的一家小小报刊门市部，伊急中生智讲，“阿拉老师一直叫阿拉看报纸咯，喏，报纸上的重要社论，阿拉老师讲社论侪写得老好咯，值得一读，值得学习。”
“噢，原来如此，不过，阿爸，侬要是以后想写小文章，侬可以多看看《新民晚报》副刊“繁花”上的文章，侪是有名的作家写的好文章，我常朝看咯。”
“好咯，好咯，阿爸看，阿爸看。”“酒甏”松了一口气，心里嘀咕，乖乖，差点出洋相。
“哎，阿爸，阿拉穿马路到对面跃胜百货店去，好伐？我想到里面去看看。”
“好呀，好呀。”“酒甏”只要囡娪不问伊写作班的事体，样样侪答应。
“阿爸，我一直想帮侬买一条好的全羊毛围巾，不晓得侬欢喜啥颜色，今朝正好，侬去看看，好伐？”
“啊哟，覅，覅，侬覅帮我买，我有条旧的，戴戴蛮好咯，覅去浪费铜钿！”
“要买咯，侬在门房间工作，上海冬天又冷又阴丝丝，侬应该有一条好的羊毛围巾。”
“覅，覅买，覅浪费钞票了。”“酒甏”不肯去跃胜。
“阿爸，侬要是不让我给侬买围巾，个么，我也不要侬给买生日蛋糕，阿拉回去，算了。”
“酒甏”呒么想到给囡娪将了一军。
“好吧，好吧，听侬咯，买一条围巾，覅买太鉅的，好伐？”
“好，好。”慧娟嘴上答应，进了跃胜直奔围巾柜台，伸手挑了一条最好的围巾递给营业员，付了铜钿。
囡娪给自家买围巾，“酒甏”当然开心，但伊肉痛铜钿，更肉痛囡娪，辛辛苦苦工作，自家不舍得为自家花铜钿，给我一个糟老头买嘎好的围巾。
回家路上，慧娟拎着蛋糕，“酒甏”抱着围巾，路过高美服装店跟蓝棠皮鞋店，“酒甏”看着橱窗里的好看的衣裳锃亮的皮鞋讲：
“慧娟， 里面的衣裳皮鞋侬看中哪一件哪一双，告诉阿爸，好伐，也让阿爸给侬买一样。”
“不用了，阿爸，侬还记得，我小辰光，侬看见对面伍善记的童装老好看，也想让我穿嘎好看的连衣裙，但伍善记的童装老老鉅，到底是上海滩最最高档的童装店，侬请仁仁姆妈到迭爿店剥样子帮我做了一条老漂亮的连衣裙，侬还记得伐？”
“是有迭桩事体，侬还记得啊！”
“当然记得！我长高了，裙子显短了，姆妈又请仁仁姆妈帮我的裙子接一䘿，我穿了好几年。”
父女俩开开心心回家。
“酒甏”老婆一看到“酒甏”，拿伊拉到一边讲：
“跟侬讲早点回来，早点回来，哪恁嘎晏才回来，有要紧事体要侬做！”
“啥事体啊？大惊小怪！”
“酒甏”娘子凑到“酒甏”身旁，开始“咬耳朵”：
“快去问晶晶阿娘讨双胞胎尿布，快！我听说苏州好婆媳妇兒子生好了，已经拿双胞胎尿布还给晶晶阿娘了，侬快去讨来，去晏了，给别人家讨了去，就麻烦了。”
“阿拉媳妇有了？”
“还呒么，好像还呒么。”
“个么，去讨啥啦！”
“晏了，给别人家讨的去就麻烦了。侬快点吃了慧娟的生日面就去。”
“酒甏”一听，对啊！给人家拿去了，就麻烦了，迭桩事体太重要，太要紧了！原本要坐下来吃面，不吃了，起身就走。
“老头子，侬不吃啦？”“酒甏”娘子追在后面叫，“酒甏”已经穿过马路，直奔138弄。
