（64） “不死来玩啊！”/梧桐树下
“笃，笃，笃”有人敲门。
仁仁姆妈放下手中正在编结的绒线领套，去开门，来客是裁缝阿祥。
“惊吵，惊吵！清扰，清扰！”阿祥十分地道，一连串的客套招呼着走进来。
“咦，侬哪恁有空跑出来？”
“一么，要来谢谢侬，二么，有桩事体相托。”
“哦？”
“先要谢谢侬，真正感激得很！自从，侬讲给我听富丽绸布商店有零头布卖，我去过好几趟了，买了不少，有的零头布根本不能算零头布，有一米多长了，听说是每匹布的最后一段，侪是两尺七门幅的，我买了好几块，当然，慧娟也帮了我不少忙。我做了交关假领头，还做了一些衬衫裤子，店铺外面一挂，几乎一挂出去就有人来买，老老抢手，覅布票的东西会得不吃香？！侬讲，对伐？我准备再做些方领衫，做些童装，女小人的连衣裙，男小人的衬衫短裤……，一定也会老抢手。”
“迭个肯定的，覅布票就老吸引人了，再讲，侬做工又好，价钿又不鉅，绝对受欢迎。”
“侬讲，我应不应该谢谢侬。还有，仁仁姆妈，阿拉丽华现在老开心，学堂领导老器重伊。迭个也要感谢侬，告诉我伊可以去读师范，现在伊有大学文凭，又在市重点中学教书，伊老开心，阿拉一家门侪老开心！侬真帮了我的大忙，啊要谢谢侬？我也真不晓得哪恁谢侬！我也呒么好物事送侬，阿拉老太婆的阿弟是采购员，迭次去出差，买到交关大闸蟹，还有泥鳅，我拿点来，请倷尝尝！我去拿进来，放了倷灶披间的水斗里，好伐？”
“哎，有好物事吃，有啥不好？不过呢，侬也难般有的，留着自家吃，给侬屋里几个小人吃。”
“侬覅客气，阿拉还有，外地大闸蟹呒么人吃，老老便宜，三角五分一斤！伊买了一大堆！”
“大闸蟹，阿拉屋里人人欢喜，不过，侬覅客气，讲给我听一共几钿，阿拉亲兄弟明算账。”
“勿来三！勿来三！迭趟是谢侬咯，侬要是付钞票，阿拉屋里老太婆要骂我了！要讲我做不来事体。侬迭趟一定覅客气，别个，我回去呒么办法交代。阿拉丽华也要讲我咯。”
“侬不收铜钿，哪恁可以？！我哪恁好意思啊！”
“侬帮了我大忙，自从有了零头布，我现在进账好交关，手头不紧了。讲给侬听，我又开始存铜钿了，将来两个小孩读大学派用场。……迭次是我谢侬咯！不好算铜钿咯，不然，就是侬看不起我了！我还拿了几只给‘酒甏’了，让伊过老酒。我也帮‘酒甏’一家做了假领头，伊经常帮我买碎蛋糕碎饼干，我啊要谢谢伊。好了，我要走了，我要拿几只蟹给‘酒甏’去。”
阿祥转身要走，看见台子上的绒线领套。
“咦，仁仁姆妈，侬拿迭只结好的绒线领套拆脱，做啥？”
“还不是迭两个讨债鬼小丫头！”仁仁姆妈摇摇头，“今年冬天我事体多，就叫几个丫头自家结绒线领套，我拿用剩的绒线分成颜色不同的四堆，让伊拉摸彩，摸到啥颜色就啥颜色。结果，仁仁摸到绿颜色的，蛮好看的墨绿色，伊结好戴在头颈上，佳佳迭个小丫头看见，取笑伊讲乌龟的头颈是绿颜色的，叫仁仁‘小乌龟’，那么仁仁吵了闹了，唉，女小人太多真正烦！”
阿祥听了哈哈哈笑，突然停住，讲：“啊呀呀，讲言话讲昏头了，正经事体忘记了，我有桩事体要托侬，侬要是看见贝小姐啊好跟伊讲伊的骆驼绒夹里短袄改好了，好拿了。”
“侬覅客气，一句言话。”仁仁姆妈一口答应，“不过，交关辰光呒么看见伊了。喏，这只绒线领套就是结给贝小姐咯，那边两只领带做的假领头也是给伊的，侪是顾妈关照咯。伊帮顾妈大忙，顾妈一心一意要谢伊，这两天也头颈伸得老长在寻伊。”
“勿晓得啊是回老家看伊姆妈去了。伊是独生囡娪，一直呒么结婚，伊姆妈急煞，一直失眠，得了高血压，还有贫血，还有眼底黄斑，交关毛病。伊姆妈想叫伊快快嫁人，又担心伊嫁错人，一辈子受苦，放心不落！嗨，可怜天下父母心！”阿祥师傅常照帮贝小姐做衣裳，对伊比较了解。
“不是讲伊有男朋友了？不是讲伊要结婚了？”
“是咯，是咯。男方好像是五四中学的老师。人老敦样，我看见过，高高大大，贝小姐老中意咯，两介头好像要结婚了。”
“个么，老好呀！”
“是老好呀！可以讲贝小姐老欢喜迭个男老师，照现在的讲法贝小姐‘老吃’迭个男老师咯。男老师也对贝小姐蛮有意思，还请贝小姐在铜仁路口的上海咖啡馆喝咖啡唻，侬晓得咯，男方要是请女方到上海咖啡馆喝咖啡，说明男方老有意思了，差不多‘敲定’了，对伐？伊拉常朝到外滩，到复兴公园，到桂林公园，到佘山去白相……。不过，最近一段辰光好像两介头不大在一道，”阿祥师傅吃了一口茶，润润喉咙接着讲：
“据说，贝小姐跟那个男老师熟了么，讲言话随便了，分手道别辰光跟伊个男老师讲‘不死来玩耍！’”
“迭个啥意思啊？哪恁可以讲迭种言话？”仁仁姆妈不懂了。
“侬不晓得，贝小姐老家镇江，镇江人分手辰光的一句常用客套话是 ‘你没事来玩耍！’镇江人往往省去‘你’字，讲得少许快一点，听上去就像 ‘不死来玩耍！’了解镇江话的人侪晓得嗰。伊个男老师，书生一位，不懂啊！听了气煞！”
“个么，侬去劝劝呀！”
“阿拉老法婚姻，呒么搿过朋友，呒么谈过啥个爱，迭种事体搞不清，劝不来！嗳，要么叫顾妈去，伊老想帮贝小姐忙咯。”
“哦呦呦！不来三咯！不来三咯！顾妈谈过恋爱啦？伊急起来，会硬来的！不来三咯！不来三咯！”
